Námsefni

Athafnanám eða verklegt nám gefur nemendum tækifæri til að æfa orðaforða og málfarsatriði í aðstæðum sem reynir á þá á sambærilegan hátt og í samræðum.

Það getur hins vegar verið mjög erfitt fyrir þá sem eru að læra annað tungumál að vera settir í þær aðstæður að búa til setningar frá eigin brjósti án nokkurra hjálpargagna. Þess vegna eru myndorða- og samtalsspjöld kærkomin viðbót við hefðbundnari kennslugögn.

Gildi endurtekningarinnar verður seint ofmetin í tungumálanámi. Besta trygging þess að endurtekningin verði ekki of einhæf eru fjölbreyttar kennsluaðferðir. 

Fjölbreyttar aðferðir gefa ekki aðeins tækifæri til meiri þjálfunar í viðfangsefninu heldur auka þær einnig líkurnar á skilningi nemenda/skjólstæðinga á því. Breytt endurtekning ýtir þar af leiðandi undir nám sem er auðvitað meginmarkmiðið með allri kennslu.

Allt námsefni Íslenskunámunnar gefur bæði nemendum og kennurum tækifæri til að fara í helstu viðfangsefni íslenskunámsins með nýrri og nýrri aðferði.

Myndorðaspjöldin og gagnvirku verkefnin henta vel til alls konar hópvinnu. 

• Samtalsspjöldin henta ef til vill best til paravinnu 
• myndorðaspjöldin (þemapakkar og myndorðakassinn) eru frekar hugsuð til hópvinnu (3-4 í hóp)
• gagnvirku verkefnin á Quizlet bjóða upp á að þau séu unnin jafnt sem hóp- og einstaklingsverkefni.
• mælt er með því að Kahoot verkefnin séu unnin sem gagnvirkir námsleikir með virkri kennslu á milli spurninga. 
• skriflegu verkefnin eru frekar hugsuð sem einstaklingsverkefni þó það megi líka vinna þau til dæmis í pörum.

Það eru þó nokkrar hugmyndir af para- og hópvinnuverkefnum í notkunar- og kennsluleiðbeiningunum með námsefninu sem Íslenskunáman hefur gefið út.

Stundum er jafningjafræðsla besta leiðin til að kveikja skilning þeirra sem ná ekki að fylgjast með í kennslustundum vegna skorts á sameiginlegu tungumáli og/eða skilningi á málfræðihugtökum og málfarsskýringum.

• Athafnanám með hópvinnu er prýðileg leið til að opna á möguleika til jafningjafræðslu.
• Hópvinnuleikirnir á Quizlet henta líka afar vel til að ýta undir jafningjafræðslu.

Nemendur á öllum aldri kunna að meta það þegar kennslustundirnar eru brotnar upp með leikjum. Íslenskunáman býður upp á ýmis konar námsefni sem nýtist til leikjunar:

• Námsleikir inni á Quizlet og Kahoot.
• Myndorðaspjöld sem má nota sem borðspil.
• Samtalsspjöld sem er hægt að nota í para- og hópvinnuleikjum.

Allt námsefni Íslenskunámunnar er mjög myndríkt*. Meginástæðan er sú að höfundur hefur reynt það í sinni kennslu að ekkert virkar jafnvel til að brúa tungumálabilið á milli þeirra, sem hafa ekkert sameiginlegt tungumál, en greinilegar og lýsandi myndir.

Myndskreytt námsefni kveikir ekki bara á skilningi heldur líka áhuga jafnt hjá yngri og eldri nemendum.

*Myndirnar eru aðallega fríar myndir af Netinu. Í Staðarorðunum er mikið af ljósmyndum en sækja þurfti um leyfi fyrir mörgum þeirra. Sumir óskuðu eftir því að nöfn þeirra kæmu fram á myndunum.

Myndorðaspjöld Íslenskunámunnar og gagnvirk orðaforðaverkefni styðja við þessa kennsluaðferð sem er ómetanleg í annarsmálskennslu; ekki síst í þeim tilvikum sem nemendur og kennari hafa ekkert sameiginlegt tungumál.

Samkvæmt reynslu höfundar virkar hópvinna einna best til að uppgötvunarnám eigi sér stað.